Moldova Respublikası, Ukrayna, Belarus Respublikası və Rusiya Federasiyasının gömrük xidmətləri arasında meyvə-tərəvəz məhsullarının gömrük rəsmiləşdirilməsi zamanı güzəştlərin təqdim edilməsi haqqında Saziş

Bundan sonra Tərəflər adlandırılan bu Sazişin iştirakçıları olan gömrük xidmətləri,

Gömrük xidmətlərinin əməkdaşlığı yolu ilə meyvə-tərəvəz məhsullarının yük, tranzit axınının inkişafı və sürətləndirilməsinə yardım etməyə çalışaraq,

Müstəqil Dövlətlər Birliyi iştirakçı — dövlətlərinin gömrük xidmətləri arasında gömrük sərhədlərində gömrük rəsmiləşdirilməsi prosedurlarının sadələşdirilməsi və unifikasiyası haqqında 8 iyul 1994-cü il tarixli Sazişin 10-cu Maddəsini rəhbər tutaraq,

Tərəflər dövlətlərin ərazisində yollarda meyvə-tərəvəz məhsullarının daşınması üçün maneəsiz şərtlərin təmin edilməsi məqsədilə,

aşağıdakılar barədə razılığa gəldilər:

Maddə 1

Tərəflər:

a) Tərəf dövlətlərin ərazisində istehsal olunan meyvə-tərəvəz məhsullarının gömrük rəsmiləşdirilməsinin sadələşdirilməsi üzrə razılaşdırılmış tədbirlər görürlər;

b) bir-birlərinin gömrük təminatlarını (plomblar, möhür şəkilləri, möhürlər, ştamplar), gömrük sənədlərini tanıyırlar, zəruri hallarda isə, keçirilən məhsullara öz gömrük təminatlarını vururlar.

Maddə 2

Tərəf dövlətlərin ərazisində istehsal olunan meyvə-tərəvəz məhsulları gömrük ərazisindən növbədənkənar qaydada buraxılır.

Maddə 3

Tərəf dövlətlərin dövlət ərazisində meyvə-tərəvəz məhsullarının mənşəyini təsdiq edən sənədlər kimi, malların ST-1 formalı mənşə sertifikatını, yaxud malların mənşə ölkəsinə dair məlumatları əks etdirən yük nəqliyyat və malları müşayiət edən digər sənədləri tanımaq.

Bu maddənin müddəaları Ukrayna tərəfindən tranzit keçirilən meyvə-tərəvəz məhsulları ilə bağlı tətbiq edilir.

Maddə 4

Bu Saziş imzalandığı andan qüvvəyə minir.

Maddə 5

Bu Saziş imzalandığı andan üç il müddətinə bağlanılır.

Moskva şəhərində 21 may 1998-ci il tarixdə hər biri eyni qüvvəyə malik olan 4 nüsxədə imzalanmışdır.

Belarus Respublikası gömrük xidməti adından

Moldova Respublikası gömrük xidməti adından

Rusiya Federasiyası gömrük xidməti adından

Ukrayna gömrük xidməti adından

Azərbaycan Respublikası Prezidentinin 29 aprel 2003-cü il tarixli 1210 nömrəli Sərəncamı ilə təsdiq edilmişdir («AzerSoft»).