Azərbaycan Respublikasının Nazirlər Kabineti
«Dərman vasitələrinin humanitar məqsədlər üçün Azərbaycan Respublikasına idxalı Qaydası»nın təsdiq edilməsi haqqında

Qərar № 141

Bakı şəhəri, 25 sentyabr 2007-ci il
«Dərman vasitələri haqqında» Azərbaycan Respublikası Qanununun tətbiq edilməsi barədə» Azərbaycan Respublikası Prezidentinin 2007-ci il 6 fevral tarixli, 528 nömrəli Fərmanının 1.4-cü bəndinin icrasını təmin etmək məqsədi ilə Azərbaycan Respublikasının Nazirlər Kabineti qərara alır:

1. «Dərman vasitələrinin humanitar məqsədlər üçün Azərbaycan Respublikasına idxalı Qaydası» təsdiq edilsin (əlavə olunur).

2. Bu qərar imzalandığı gündən qüvvəyə minir.

Azərbaycan Respublikasının Baş naziri
A. RASİ-ZADƏ

Azərbaycan Respublikası
Nazirlər Kabinetinin
2007-ci il 25 sentyabr tarixli,
141 nömrəli qərarı ilə
təsdiq edilmişdir

Dərman vasitələrinin humanitar məqsədlər üçün Azərbaycan Respublikasına idxalı
Qaydası

1. Bu Qayda Azərbaycan Respublikası Prezidentinin 2007-ci il 6 fevral tarixli, 528 nömrəli Fərmanının 1.4-cü bəndinə əsasən hazırlanmışdır və dərman vasitələrinin humanitar məqsədlər üçün Azərbaycan Respublikasına idxalı qaydasını müəyyən edir.

2. Xarici ölkələrdən humanitar məqsədlər üçün dərman vasitələrinin Azərbaycan Respublikasının ərazisinə idxalı Azərbaycan Respublikasının Səhiyyə Nazirliyi tərəfindən verilən rəy əsasında həyata keçirilir.

3. Azərbaycan Respublikasının Səhiyyə Nazirliyi tərəfindən keyfiyyətinə təminat verilməyən dərman vasitələrinin humanitar məqsədlər üçün Azərbaycan Respublikasına idxalı qadağandır.

4. Epidemiya, təbii fəlakət və digər fövqəladə hallarda Azərbaycan Respublikasında dövlət qeydiyyatına alınmayan dərman vasitələrinin humanitar məqsədlər üçün idxalına istehsalçı ölkələrdə qeydiyyatı və istifadəsini təsdiq edən sənədlər olduqda, Azərbaycan Respublikası Nazirlər Kabinetinin qərarı ilə yol verilir.

5. Xarici ölkələrdən humanitar məqsədlərlə dərman vasitələrinin idxalına rəy alınması üçün hüquqi şəxslər və fərdi sahibkarlar və ya həmin malları gətirən humanitar təşkilatlar (bundan sonra — ərizəçilər) aşağıdakı sənədlərin əslini və bir ədəd surətini Azərbaycan Respublikasının Səhiyyə Nazirliyinə təqdim etməlidirlər:
5.1. dərman vasitələri (xəstəliklərin diaqnostikası və müalicəsi məqsədi ilə istifadə edilən tibb vasitələri istisna olmaqla) üçün:

xarici ölkələrdən humanitar məqsədlər üçün gətirilən dərman vasitələrinin idxalına rəy verilməsi haqqında ərizə;
humanitar yardım göstərilməsi barədə müqavilə və ya ianə məktubu;
dərman vasitələrinin adları (ticarət və beynəlxalq patentləşdirilməmiş), istehsalçı ölkə, istehsalçı şirkət, dərman vasitələrinin dozası, dərman forması, miqdarı, yararlılıq müddəti və qiyməti qeyd olunmaqla, spesifikasiyası (spesifikasiya hüquqi şəxs olan ərizəçinin rəhbərinin imzası və hüquqi şəxsin möhürü, fərdi sahibkar olan ərizəçinin imzası ilə təsdiq olunmalıdır);
humanitar yardımın təhvil verildiyi tibbi fəaliyyətlə məşğul olmaq hüququ olan hüquqi şəxslərin və fərdi sahibkarların siyahısı göstərilməklə bölüşdürmə planı;
dərman vasitəsinin istifadə təlimatı;
idxal olunan hər mal dəsti üçün dərman vasitələrinin keyfiyyətini təsdiq edən sənədlər.

5.2. Xəstəliklərin diaqnostikası və müalicəsi məqsədi ilə istifadə edilən tibb vasitələri (tibb cihazları, məmulatları, əşya və materialları, alətləri, avadanlıqları, tibbi reaktivlər və optik ləvazimatlar) (bundan sonra - tibb vasitələri) üçün:

xarici ölkələrdən humanitar məqsədlər üçün gətirilən tibb vasitələrinin idxalına rəy verilməsi haqqında ərizə;
humanitar yardım göstərilməsi barədə müqavilə və ya ianə məktubu;
tibb vasitələrinin adları, istehsalçı ölkə, istehsalçı şirkət, miqdarı, buraxılış ili, yararlılıq müddəti və qiyməti qeyd olunmaqla, spesifikasiyası (spesifikasiya hüquqi şəxs olan ərizəçinin rəhbərinin imzası və hüquqi şəxsin möhürü ilə, fərdi sahibkar olan ərizəçinin isə imzası ilə təsdiq olunmalıdır);
tibb vasitəsinin texniki pasportu və ya istifadə təlimatı;
tibb vasitəsinin keyfiyyətini təsdiq edən sənədlər;
humanitar yardımın təhvil verildiyi tibbi fəaliyyətlə məşğul olmaq hüququ olan hüquqi şəxslərin və fərdi sahibkarların siyahısı göstərilməklə bölüşdürmə planı.

6. Bu Qaydanın 5-ci bəndində göstərilən sənədlərin əslləri ərizəçilərə geri qaytarılır, surətləri isə Azərbaycan Respublikasının Səhiyyə Nazirliyində saxlanılır.

7. Əsli xarici dillərdə olan sənədlərin surətləri Azərbaycan dilinə tərcümə olunaraq, notarial qaydada təsdiq edilməlidir.

8. Xarici ölkələrdən humanitar məqsədlər üçün Azərbaycan Respublikasının ərazisinə daxil olan dərman vasitələrinin yararlılıq müddətinin qalığı olmalıdır:

iki ildən az olmamaq şərtilə - yararlılıq müddəti beş il olan dərman vasitələri üçün;
bir ildən az olmamaq şərtilə - yararlılıq müddəti beş ildən az olan dərman vasitələri və tibbi steril vasitələr üçün.

Xarici ölkələrdən humanitar məqsədlər üçün Azərbaycan Respublikasına daxil olan tibb vasitələrinin istismarda olduğu müddət istehsal olunduğu tarixdən etibarən 5 ildən artıq olmamalıdır.
Xarici ölkələrdən humanitar məqsədlər üçün daxil olan dərman və tibb vasitələrinin idxalına rəy verən Azərbaycan Respublikası Səhiyyə Nazirliyinin qərarı ilə bu bəndin birinci və ikinci hissələrində qeyd olunan müddətlər dəyişdirilə bilər.

9. Qablaşdırılmış hər konteynerin (tara) markalanmasında ticarət və beynəlxalq patentləşdirilməmiş adı, seriyanın nömrəsi, dərman forması, istehsalçının adı, istehsalçı ölkə, konteynerdəki taranın miqdarı, saxlanma şəraiti və yararlılıq müddəti qeyd olunmalıdır.
Dərman vasitələri beynəlxalq daşınma qaydalarına uyğun olaraq qablaşdırılmalı, ticarət və beynəlxalq patentləşdirilməmiş adı, dərman forması, miqdarı, seriya nömrəsi, yararlılıq müddəti, həcmi, çəkisi və saxlanma şəraiti qeyd olunmaqla, nömrələnmiş hər bir karton qutunun tərkibini göstərən müfəssəl qablaşdırma vərəqəsi ilə müşayiət edilməlidir. Eyni qablaşmada dərman vasitələri digər vasitələrlə qarışdırılmamalıdır.

10. Azərbaycan Respublikasının Səhiyyə Nazirliyi təqdim olunmuş sənədlərin ekspertizasının nəticələrinə əsasən xarici ölkələrdən humanitar məqsədlər üçün gətirilən dərman vasitələrinin idxalına rəy verir.

11. Azərbaycan Respublikasının Səhiyyə Nazirliyi dərman vasitələrinin humanitar məqsədlər üçün Azərbaycan Respublikasının ərazisinə gətirilməsinə aşağıdakı hallarda mənfi rəy verir:
11.1. bu Qayda ilə müəyyən edilmiş sənədlər təqdim edilmədikdə;
11.2. təqdim edilmiş sənədlərdə uyğunsuzluqlar aşkar edildikdə;
11.3. dərman vasitəsi Azərbaycan Respublikasında dövlət qeydiyyatından keçmədikdə;
11.4. humanitar məqsədlərlə gətirilən dərman vasitəsinin saxtalığı və ya qeyri-qanuni istehsal olunduğu aşkar edildikdə;
11.5. dərman vasitəsinin təhlükəsizliyinin, səmərəliliyinin və keyfiyyətinin laborator tədqiqatı mənfi nəticə verdikdə;
11.6. humanitar məqsədlərlə idxal olunan dərman vasitəsinin yararlılıq və yaxud istismar müddəti bu Qaydanın 8-ci bəndində göstərilmiş şərtlərə uyğun gəlmədikdə.

12. Humanitar məqsədlər üçün Azərbaycan Respublikasının ərazisinə idxal edilən dərman vasitələrinin gömrük rəsmiləşdirilməsi bu Qaydanın tələbləri nəzərə alınmaqla, Azərbaycan Respublikasının qanunvericiliyinə uyğun olaraq həyata keçirilir.

13. Humanitar məqsədlər üçün Azərbaycan Respublikasının ərazisinə gətirilən dərman vasitələri gömrük məntəqələrində rəsmiləşdirilərkən, ərizəçilər Azərbaycan Respublikası Səhiyyə Nazirliyinin müvafiq rəyini gömrük orqanlarına təqdim etməlidirlər.
Eyni zamanda, humanitar məqsədlər üçün Azərbaycan Respublikasının ərazisinə gətirilən dərman vasitələri gömrük məntəqələrində rəsmiləşdirilərkən, həmin dərman vasitələrini gətirən ərizəçilər Beynəlxalq Humanitar Yardım üzrə Respublika Komissiyasının razılığını gömrük orqanlarına təqdim etməlidirlər.

14. Azərbaycan Respublikasının Dövlət Gömrük Komitəsi humanitar məqsədlər üçün Azərbaycan Respublikasının ərazisinə gətirilən dərman vasitələrinin gömrük rəsmiləşdirilməsini Azərbaycan Respublikası Səhiyyə Nazirliyinin mütəxəssislərinin iştirakı ilə həyata keçirir.

© VES Consultancy LLC