2009-cu il noyabrın 11-də Bakı şəhərində imzalanmış «Azərbaycan Respublikası Dövlət Gömrük Komitəsi və Ümumdünya Gömrük Təşkilatı (ÜGT) arasında Azərbaycan Respublikasının Bakı şəhərində Potensialın Gücləndirilməsi üzrə Ümumdünya Gömrük Təşkilatının Regional Ofisinin yaradılması ilə əlaqədar Anlaşma Memorandumu»nun təsdiq edilməsi haqqında

Azərbaycan Respublikası Prezidentinin Sərəncamı

1. 2009-cu il noyabrın 11-də Bakı şəhərində imzalanmış «Azərbaycan Respublikası Dövlət Gömrük Komitəsi və Ümumdünya Gömrük Təşkilatı (ÜGT) arasında Azərbaycan Respublikasının Bakı şəhərində Potensialın Gücləndirilməsi üzrə Ümumdünya Gömrük Təşkilatının Regional Ofisinin Yaradılması ilə əlaqədar Anlaşma Memorandumu» təsdiq edilsin.

2. Azərbaycan Respublikasının Dövlət Gömrük Komitəsinə tapşırılsın ki, bu Sərəncamın 1-ci bəndində göstərilən Memorandumun həyata keçirilməsini təmin etsin.

3. Azərbaycan Respublikasının Xarici İşlər Nazirliyinə tapşırılsın ki, bu Sərəncamın 1-ci bəndində göstərilən Memorandumun qüvvəyə minməsi üçün zəruri olan dövlətdaxili prosedurların yerinə yetirilməsi barədə Ümumdünya Gömrük Təşkilatını xəbərdar etsin.

Azərbaycan Respublikasının Prezidenti
İlham ƏLİYEV
Bakı şəhəri, 15 mart 2010-cu il
№ 798

Azərbaycan Respublikası Dövlət Gömrük Komitəsi və Ümumdünya Gömrük Təşkilatı (ÜGT) arasında Azərbaycan Respublikasının Bakı şəhərində Potensialın Gücləndirilməsi üzrə Ümumdünya Gömrük Təşkilatının Regional Ofisinin yaradılması ilə əlaqədar Anlaşma Memorandumu

Birlikdə «Tərəflər» adlandırılacaq Azərbaycan Respublikası Dövlət Gömrük Komitəsi (bundan sonra — Gömrük Xidməti) və «Ümumdünya Gömrük Təşkilatı (bundan sonra — ÜGT):

ticarət həcminin artması, ticarətin qloballaşması və regional inteqrasiya səbəbindən gömrük xidmətlərinin üzləşdikləri böyük çətinlikləri qəbul edərək,

ticarətin formalarının dəyişməsinin, ticarətin daha da asanlaşdırılmasına ehtiyacın və məhdud resurslarla istehsalın daha da genişləndirilməsi zərurətinin gömrük xidmətləri arasında, həmçinin ÜGT ilə geniş əməkdaşlıq tələb etdiyini qəbul edərək,

gömrük işi ilə əlaqədar əsas beynəlxalq konvensiyaların, tövsiyələrin və digər normaların vahid tərzdə icrası üçün məlumatların yayımı və potensialın gücləndirilməsi məsələsinin əhəmiyyətini dərk edərək,

ÜGT-nin potensialın gücləndirilməsi sahəsində üzv dövlətlərlə effektiv və səmərəli fəaliyyətin həyata keçirilməsi məqsədilə Potensialın Gücləndirilməsi Strategiyasını hazırladığını və bu sahədə regional yanaşma prinsipini tətbiq etdiyini nəzərə alaraq,

Avropa Regionu Baş direktorlarının 18-19 may 2009-cu il tarixində Norveçin Bergen şəhərində keçirilən Gömrük Xidmətləri Rəhbərlərinin iclasında Potensialın Gücləndirilməsi üzrə Regional Strategiyanın tərkib hissəsi olaraq ÜGT-nin Potensialın Gücləndirilməsi üzrə Avropa Regional Ofisinin (bundan sonra — «PGRO») Azərbaycan Respublikasının Bakı şəhərində yaradılması barədə qərar verdiklərini və Şuranın ÜGT-nin bu qərarını 2009-cu ilin iyun ayında Belçikanın Brüssel şəhərində keçirilən 113/114-cü sessiyalarında təsdiq etdiyini nəzərə alaraq,
aşağıdakılar barədə razılığa gəldilər:

Maddə 1. PGRO-nun rolu və vəzifələri

1. PGRO Potensialın Gücləndirilməsi Strategiyasının regional səviyyədə icrası istiqamətində ÜGT səylərinə uyğun olaraq irəli sürülmüş regional təşəbbüsdür. PGRO potensialın gücləndirilməsi sahəsində ÜGT-nin Potensialın Gücləndirilməsi Strategiyasının icrası məqsədilə ÜGT Katibliyi, Gömrük Xidməti və Avropa Regionunun Baş direktorları ilə sıx əməkdaşlıq şəraitində fəaliyyət göstərəcəkdir.

2. PGRO ÜGT-nin Avropa Regionunda potensialın gücləndirilməsi mərkəzi olacaq və koordinasiya və tədbirlərin həyata keçirilməsi, qəbul edən gömrük xidmətlərinə yardım göstərilməsi və donor təşkilatlarla qarşılıqlı əlaqələrin yaradılması məsələlərinə cavabdeh olacaqdır. PGRO öz vəzifələrini 18-19 may 2009-cu il tarixində Norveçin Bergen şəhərində keçirilmiş ÜGT-nin Gömrük Xidməti Rəhbərlərinin Regional Konfransında təsdiq edilmiş ÜGT-nin Potensialın Gücləndirilməsi üzrə Regional Fəaliyyət Strategiyasına əlavə edilmiş texniki şərtlərə uyğun olaraq həyata keçirəcəkdir.

Maddə 2. Təşkilat və kadrlar

1. Gömrük Xidməti PGRO-nu Azərbaycan Respublikasının Bakı şəhərində zəruri ofis avadanlıqları ilə təmin edəcəkdir.

2. PGRO-ya Avropa regionunun üzvləri tərəfindən təqdim olunan əməkdaşlar, eləcə də PGRO rəhbəri işə qəbul ediləcəkdir. PGRO əməkdaşları təmsil etdikləri gömrük təşkilatı və ev sahibi olan gömrük xidmətinə münasibətdə müstəqil olacaqlar.

Maddə 3. Xərclər

1. Əməkdaşlarını PGRO-ya təqdim edən üzv idarələr əməkhaqqı, gündəlik xərclər, yaşayış xərcləri, daşınma və yerləşmə məsrəfləri kimi xərcləri və ya əməkhaqlarının təyinatı ilə bağlı hər hansı digər xərcləri öz üzərinə götürəcəklər.

2. Əməkdaşlarını PGRO-ya təqdim edən üzv idarələr öz əməkdaşlarının fəaliyyəti çərçivəsində daxili və xarici səfərləri ilə bağlı xərcləri də öz üzərinə götürəcəklər.

3. Gömrük Xidməti PGRO-nu mebel, telefon və faks, surətçıxarma maşını kimi zəruri ofis avadanlıqları ilə təmin edəcək və elektrik enerjisi, istilik, su və gündəlik fəaliyyətlə bağlı digər xərcləri ödəyəcəkdir.

Maddə 4. PGRO-nun və onun əməkdaşlarının statusu

Azərbaycan Respublikasının Hökuməti PGRO-ya və onun işçi heyətinə zəruri hesab edilən istənilən imtiyaz və immuniteti verə bilər.
Maddə 5 Koordinasiya

ÜGT və Gömrük Xidməti bu Anlaşma Memorandumu imzalandığı tarixdən etibarən bir ay müddətində onun icrası ilə bağlı məsələlərin koordinasiyası üçün əlaqələndirici şəxslər təyin edəcəklər.

Maddə 6. Qüvvəyəminmə və müddət

1. Bu Anlaşma Memorandumu imzalandığı tarixdən qüvvəyə minəcəkdir.

2. Hər bir Tərəf bu Anlaşma Memorandumunu istənilən an yazılı bildiriş göndərilməsi şərtilə ləğv edə bilər. Bu Anlaşma Memorandumu digər Tərəfin belə bildirişi almasından dərhal sonra qüvvədən düşmüş hesab olunacaqdır.

3. Bu Anlaşma Memorandumu Tərəflərin qarşılıqlı razılığı əsasında yazılı formada dəyişdirilə bilər.
Azərbaycan Respublikasının Bakı şəhərində 2009-cu il 11 noyabr tarixində, Azərbaycan və ingilis dillərində, iki əsl nüsxədə imzalanmışdır.

ÜGT-nin Potensialın Gücləndirilməsi üzrə Regional Ofisi ilə bağlı foto və video materialları yükləyin.